陳豪喪讚BB靚仔　剪臍帶感覺玄妙

陳茵媺（Aimee）前日為陳家繼後香燈，新任爸爸陳豪（Moses）急不及待搵奶粉錢，昨日在金鐘出席聖誕亮燈儀式，穿上紅色皮褸亮相，一身喜氣。陳豪透露親替「小Mo子」剪臍帶，並為兒子改英文名Aiden，Moses在短短約十分鐘訪問已六次讚B仔「好靚仔」，遺傳了媽咪的美麗配方。

現年42歲的陳豪和32歲的陳茵媺是圈中恩愛夫婦，6月在法國註冊結婚，7月中在加拿大多倫多補擺喜酒，當時Aimee已懷孕四個月，原定預產期是今個聖誕節，不過BB要提早出世。據悉Aimee前日朝早突然作動，在醫生建議下入院準備生B，至下午順產誕下小寶貝，為陳家增添一名新成員。
昨晚7時許，陳豪在金鐘太古廣場出席聖誕亮燈儀式，吸引近百記者採訪。穿上全套約值五萬五千元的Lanvin紅色皮褸襯西褲的陳豪，帥氣十足，司儀楊洛婷問他最想要甚麼聖誕禮物？陳豪甜笑說：「我個Baby噚日（前日）arrived已經係我最大禮物。」現場聖誕老人送上機械人模型，讓他轉送給「小Mo子」。

[img]http://static.apple.nextmedia.com/images/apple-photos/apple/20131206/small/06ec1p10new.jpg[/img]
■「小Mo子」鼻子高高，與媽咪茵媺鼻尖擦鼻尖，好溫馨。微博圖片

[img]http://static.apple.nextmedia.com/images/apple-photos/apple/20131206/small/06ec1p11.jpg[/img]
■「小Mo子」的小手握住媽咪手指，動人一刻應該是由爸爸親自拍攝。

[b]陳茵媺餵人奶[/b]
陳豪全程笑到四萬咁口，他說：「BB噚日（前日）下晝出世，但正確時間唔講，順產BB好健康。」他直言BB出世後有好多善後工作，體貼的他表示要先照顧Aimee身體，再通知朋友，所以延至昨日凌晨才在微博公佈喜訊，陳豪續說：「BB重6磅11安士，我有入產房陪太太，雖然冇拍片，但有親手剪臍帶，感覺好好，好玄妙同好感動。」他自言沒喊，至於太太有沒有流下開心淚，他沒有正面回應，只說：「佢好辛苦，生BB唔容易，佢好堅強同強壯，令過程好順利。我好緊張，幫唔到佢，都係靠佢自己努力。」他透露Aimee會餵人奶，讓BB得到最天然的營養。
問到「小Mo子」似邊個？陳豪忍不住五次讚兒子靚仔，他說：「個個都似，好靚仔。唔係話似我，但佢一出世就好靚仔，可能作為父親，真係好靚仔，唔係講笑，靚仔又健康。」再被追問是否有他遺傳？他笑說﹕「我唔靚仔，BB靚啲，太太都好靚。」

[b]囝囝叫Aiden[/b]
陳豪表示與Aimee已替BB改英文名Aiden，承認與Aimee頭兩個英文字一樣有關，但不肯講當中意思，中文名則詢問長輩意見。翻查資料，Aiden源自愛爾蘭語，意指「激烈的」及溫暖小火，未知是否暗示兩人轟烈的愛情。陳豪昨間中咳嗽，但表示會戴口罩抱BB，為BB換片時有否被「擊中」？他笑說：「仲避到，未試過同仔沖涼，𠵱家湊BB都有啲手忙腳亂。」
有甚麼獎勵給太太？陳豪冧爆說：「點都得啦，做媽咪咁辛苦！」他直言外父外母仍未來港，有指陳豪明年1月約滿無綫後不再續約，並會為戚其義開新劇，更傳有20萬一集，他表示工作稍後才談，並再讚兒子靚仔說：「呢一刻仲未相信變成事實（做爸爸），睇住佢出世，見佢咁靚咁可愛，真係上天畀我一份好好嘅禮物，媽咪都讚BB好cute。」他直言想追多個，自己暫時停工陪老婆。活動完畢，陳豪趕往舊山頂道嘉諾撒醫院探妻，同行還有媽媽和哥哥，陳媽媽說：「見過（BB）。」朱凱婷昨晚也有探望，而陳豪似要通宵留守陪太太。


[img]http://static.apple.nextmedia.com/images/apple-photos/apple/20131206/small/06ec1p1.jpg[/img]
■剛榮升做爸爸的陳豪昨晚一身紅彤彤出席活動，坦言BB的到來是他最大的禮物。

[img]http://static.apple.nextmedia.com/images/apple-photos/apple/20131206/small/06ec1p3.jpg[/img]
■陳豪昨晚出席完活動，立即趕到醫院陪妻兒。


來源:蘋果日報網站